ਚੰਡੀਗੜ•, 23 ਜਨਵਰੀ (ਗੁਰਪ੍ਰੀਤ ਮਹਿਕ) : ਭਾਰਤੀ ਜਨਤਾ ਪਾਰਟੀ ਦੇ ਸੀਨੀਅਰ ਆਗੂ ਅਤੇ ਦੇਸ਼ ਦੇ ਸਾਬਕਾ ਡਿਪਟੀ ਪ੍ਰਧਾਨ ਮੰਤਰੀ ਸ਼੍ਰੀ ਲਾਲ ਕ੍ਰਿਸ਼ਨ ਅਡਵਾਨੀ 25 ਜਨਵਰੀ ਨੂੰ ਪੰਜਾਬ ਆ ਰਹੇ ਹਨ। ਉਹ ਇਸ ਦਿਨ ਅਕਾਲੀ ਭਾਜਪਾ ਗਠਜੋੜ ਦੇ ਉਮੀਦਵਾਰਾਂ ਦੇ ਹੱਕ ਵਿੱਚ ਚੋਣ ਪ੍ਰਚਾਰ ਲਈ ਰੈਲੀਆਂ ਨੂੰ ਸੰਬੋਧਨ ਕਰਨਗੇ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਭਾਜਪਾ ਦੇ ਸੂਬਾ ਜਨਰਲ ਸਕੱਤਰ ਸ੍ਰੀ ਕਮਲ ਸ਼ਰਮਾ ਨੇ ਦੱਸਿਆ ਕਿ ਸ਼੍ਰੀ ਅਡਵਾਨੀ ਤੋਂ ਇਲਾਵਾ ਭਾਜਪਾ ਦੇ ਕੌਮੀ ਪ੍ਰਧਾਨ ਸ਼੍ਰੀ ਨਿਤਿਨ ਗਡਕਰੀ 24 ਅਤੇ 28 ਜਨਵਰੀ ਨੂੰ ਪੰਜਾਬ ਵਿੱਚ ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਨਗੇ। ਰਾਜ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਸ਼੍ਰੀ ਅਰੁਨ ਜੇਟਲੀ ਨੇ ਆਜ ਜਲੰਧਰ ਚ ਚੋਣ ਪ੍ਰਚਾਰ ਕਿਤਾ ਅਤੇ 23 ਤੇ 24 ਜਨਵਰੀ ਨੂੰ ਫਿਰ ਚੋਣ ਰੈਲੀਆਂ ਵਿੱਚ ਹਿੱਸਾ ਲੈਣਗੇ ਜਦਕਿ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੀ ਨੇਤਾ ਸ਼੍ਰੀਮਤੀ ਸੁਸ਼ਮਾ ਸਵਰਾਜ 25 ਅਤੇ 26 ਜਨਵਰੀ ਨੂੰ ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਨਗੇ।

ਉਨਾਂ ਦੱਸਿਆ ਕਿ ਇਨਾਂ ਦੋਵੇਂ ਦਿਨਾਂ ਦੌਰਾਨ ਪਾਰਟੀ ਦੇ ਸਾਬਕਾ ਕੌਮੀ ਪ੍ਰਧਾਨ ਸ਼੍ਰੀ ਰਾਜਨਾਥ ਸਿੰਘ ਵੀ ਪੰਜਾਬ ਵਿੱਚ ਹੋਣਗੇ ਅਤੇ ਉਮੀਦਵਾਰਾਂ ਦੇ ਹੱਕ ਵਿੱਚ ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਨਗੇ। ਇਸ ਤੋਂ ਇਲਾਵਾ ਸ਼੍ਰੀਮਤੀ ਉਮਾ ਭਾਰਤੀ 22 ਨੂੰ, ਹਿਮਾਚਲ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਸ਼੍ਰੀ ਪ੍ਰੇਮ ਕੁਮਾਰ ਧੂਮਲ 26 ਅਤੇ 27 ਜਨਵਰੀ ਨੂੰ, ਉਘੀ ਅਦਾਕਾਰਾ ਅਤੇ ਰਾਜ ਸਭਾ ਦੀ ਮੈਂਬਰ ਹੇਮਾ ਮਾਲਿਨੀ 25 ਜਨਵਰੀ ਨੂੰ ਅਤੇ ਰਾਜਸਥਾਨ ਦੀ ਸਾਬਕਾ ਮੁੱਖ ਮੰਤਰੀ ਵਸੂਧਰਾ ਰਾਏ ਸਿੰਧਿਆ 27 ਜਨਵਰੀ ਨੂੰ ਪੰਜਾਬ ਦੀਆਂ ਚੋਣ ਰੈਲੀਆਂ ਵਿੱਚ ਭਾਗ ਲੈਣਗੇ।

ਉਨਾਂ ਦੱਸਿਆ ਕਿ ਗੁਜਰਾਤ ਦੇ ਮੁੱਖ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ, ਬਿਹਾਰ ਦੇ ਮੁੱਖ ਮੰਤਰੀ ਨਿਤਿਸ਼ ਕੁਮਾਰ, ਬਿਹਾਰ ਦੇ ਉਪ ਮੁੱਖ ਮੰਤਰੀ ਸੁਸ਼ੀਲ ਕੁਮਾਰ ਮੋਦੀ, ਉਘੇ ਅਦਾਕਾਰ ਅਤੇ ਸਾਬਕਾ ਕੇਂਦਰੀ ਮੰਤਰੀ ਸ਼੍ਰੀ ਸਤਰੂਘਨ ਸਿਨਹਾ ਚੋਣ ਪ੍ਰਚਾਰ ਕਰਨਗੇ। ਉਨਾਂ ਦੱਸਿਆ ਕਿ ਭਾਜਪਾ ਦੇ ਕੌਮੀ ਮੀਤ ਪ੍ਰਧਾਨ ਅਤੇ ਸੂਬੇ ਦੇ ਇੰਚਾਰਜ ਸ਼੍ਰੀ ਸ਼ਾਂਤਾ ਕੁਮਾਰ, ਭਾਜਪਾ ਦੇ ਕੌਮੀ ਜਨਰਲ ਸਕੱਤਰ ਅਤੇ ਸੂਬਾ ਚੋਣ ਇੰਚਾਰਜ ਸ਼੍ਰੀ ਜੇ.ਪੀ.ਨੱਢਾ, ਕੌਮੀ ਸਕੱਤਰ ਅਤੇ ਸੂਬੇ ਦੇ ਸਹਾਇਕ ਇੰਚਾਰਜ ਕੈਪਟਨ ਅਭਿਮੰਨੂੰ ਅਤੇ ਸ਼੍ਰੀ ਮਨੋਹਰ ਲਾਲ ਖੱਟੜ੍ ਪਹਿਲਾਂ ਹੀ ਸੂਬੇ ਦੀ ਚੋਣ ਮੁਹਿੰਮ ਨੂੰ ਸੰਭਾਲ ਰਹੇ ਹਨ।

ਪੰਜਾਬ ਦੀਆਂ ਮੋਜੂਦਾ  ਚੋਣਾਂ ਵਿੱਚ ਪਰਿਵਾਰਵਾਦ ਪੂਰੀ ਤਰ੍ਹਾਂ  ਨਾਲ ਹਾਵੀ ਨਜ਼ਰ ਆ ਰਿਹਾ ਹੈ। 30 ਜਨਵਰੀ ਨੂੰ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ  ਵਿੱਚ  ਰਿਸ਼ਤਿਆਂ ਦੇ ਸਮੀਕਰਣ   ਦੇਖੇ ਜਾ ਸਕਦੇ ਹਨ। ਜਿੱਥੇ ਇੱਕ ਭਰਾ  ਦੂਜੇ ਭਰਾ ਖਿਲਾ਼ਫ ਚੋਣ ਅਖਾੜੇ ਵਿੱਚ ਥਾਪੀਆਂ ਮਾਰ ਰਿਹਾ ਹੈ ਤੇ ਕਿਤੇ  ਕੋਈ ਪੁੱਤ ਆਪਣੇ  ਬਾਪ  ਦੇ ਮੋਢੇ ਨਾਲ ਮੋਢਾ ਮਿਲਾ ਕੇ ਚੱਲ ਰਿਹਾ ਹੈ।

ਇੱਥੇ ਮੁੱਖ ਮੁਕਾਬਲਾ  ਸ਼ਰੋਮਣੀ ਅਕਾਲੀ ਦਲ- ਬੀਜੇਪੀ ਗਠਜੋੜ , ਕਾਂਗਰਸ ਅਤੇ ਪੰਜਾਬ ਪੀਪਲਸ ਪਾਰਟੀ  ਦੇ ਵਿਚਾਲੇ ਹੈ। ਰੋਚਕ ਤੱਥ ਇਹ ਹੈ ਕਿ ਤਿੰਨਾਂ ਪਾਰਟੀਆਂ ਦੀ  ਵਾਂਗਡੋਰ  ਪਿਤਾ- ਪੁੱਤਰਾਂ ਦੇ ਹੱਥਾਂ ਵਿੱਚ ਹੋ ਆਪਣੀ –ਆਪਣੀ ਪਾਰਟੀ ਦੇ ਉਮੀਦਵਾਰ ਵੀ ਹਨ।

ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ  ਅਤੇ ਉਸਦੇ ਬੇਟੇ  ਸੁਖਬੀਰ ਸਿੰਘ ਬਾਦਲ ਅਕਾਲੀ  ਵਿੱਚ ,  ਸਾਬਕਾ ਮੁੱਖ ਮੰਤਰ ਕੈਪਟਨ ਅਮਰਿੰਦਰ  ਸਿੰਘ ਅਤੇ ਉਸਦੇ ਬੇਟੇ ਰਣਇੰਦਰ  ਸਿੰਘ ਕਾਂਗਰਸ ਦੀ ਟਿਕਟ  ਤੇ ਆਪਣੇ ਮੁਕੱਦਰ ਦੀ ਅਜ਼ਮਾਇਸ਼ ਕਰ ਰਹੇ ਹਨ । ਪਿਤਾ – ਪੁੱਤਰ ਦੀ ਤੀਜੀ ਜੋੜੀ ਪੀਪਲਜ਼ ਪਾਰਟੀ ਆਫ ਪੰਜਾਬ  ਵਿੱਚ ਗੁਰਦਾਸ  ਬਾਦਲ ਅਤੇ ਉਸਦੇ ਬੇਟੇ ਮਨਪ੍ਰੀਤ ਸਿੰਘ ਬਾਦਲ ਦੀ ਹੈ। ਮਨਪ੍ਰੀਤ ਦੋ ਸੀਟਾਂ ਤੋਂ  ਚੋਣ ਮੈਦਾਨ ਵਿੱਚ ਹਨ ।

ਵੱਧਦਾ ਪਰਿਵਾਰਵਾਦ : ਪੰਜਾਬ ਵਿੱਚ ਇਸ ਵਾਰ ਵਿਧਾਨਸਭਾ ਚੋਣਾਂ ਵਿੱਚ  ਪਰਿਵਾਰਵਾਦ  ਪੂਰੀ ਤਰ੍ਹਾਂ  ਹਾਵੀ ਨਜ਼ਰ ਆ ਰਿਹਾ ਹੈ । ਇਸੇ ਪਰਿਵਾਰਵਾਦ ਕਾਰਨ ਵੀ ਅਕਾਲੀ  ਦਲ ਅਤੇ ਕਾਂਗਰਸ ਵਿੱਚ ਫੁੱਟ ਪੈ ਗਈ ਹੈ।

ਕਾਂਗਰਸ ਦੇ  ਸੂਬਾ ਪ੍ਰਧਾਨ  ਅਮਰਿੰਦਰ ਸਿੰਘ ਦਾਅਵਾ ਕਰਦੇ ਹਨ ਕਿ ਉਹਨਾਂ ਦੇ ਬੇਟੇ ਰਣਇੰਦਰ ਸਿੰਘ  ਟਿਕਟ  ਦਿਵਾਉਣ  ਵਿੱਚ ਉਸਦਾ ਅਤੇ ਉਹਨਾਂ ਦੀ ਪਤਨੀ  ਪਰਨੀਤ ਕੌਰ ਦਾ ਕੌਈ ਹੱਥ   ਨਹੀਂ ਹੈ।  ਪਰਨੀਤ ਕੌਰ  ਯੂਪੀਏ ਸਰਕਾਰ ਵਿੱਚ ਕੇਂਦਰੀ ਵਿਦੇਸ਼ ਮੰਤਰੀ ਹਨ ।

ਪਰ ਖੁਦ ਨੂੰ ਟਿਕਟ ਦਾ ਮੁੱਖ  ਦਾਅਵੇਦਾਰ ਸਮਝਣ ਵਾਲੇ  ਅਮਰਿੰਦਰ ਸਿੰਘ ਦੇ ਭਾਈ ਮਾਲਵਿੰਦਰ ਸਿੰਘ ਇਸ  ਗੱਲ ਯਕੀਨ ਨਹੀ  ਕਰਦੇ , ਇਹੀ ਵਜਾਅ ਹੈ ਕਿ  ਉਸਨੇ ਰਣਇੰਦਰ ਖਿਲਾਫ਼  ਜੰਗ ਛੇੜਣ ਲਈ  ਅਕਾਲੀ ਦਲ ਦਾ ਪੱਲਾ ਫੜ ਲਿਆ ।

ਵੱਧ ਰਹੀ ਤਤਕਾਰ:

ਇਸ ਤਰ੍ਹਾਂ ਅਕਾਲੀ ਸਰਕਾਰ ਪਾਸੇ ਹੋਏ  ਵਿੱਤ ਮੰਤਰੀ  ਮਨਪ੍ਰੀਤ ਸਿੰਘ ਬਾਦਲ ਨੂੰ ਹਮੇਸਾ ਇਹੀ ਮਹਿਸੂਸ ਹੋਇਆ ਕਿ ਪਾਰਟੀ  ਵਿੱਚ ਉਸਦੇ ਤਾਇਆ   ਮੁੱਖ ਮੰਤਰੀ  ਪ੍ਰਕਾਸ਼ ਸਿੰਘ ਬਾਦਲ ਆਪਣੇ  ਬੇਟੇ ਸੁਖਬੀਰ ਸਿੰਘ ਬਾਦਲ  ਨੂੰ ਜਿ਼ਆਦਾ ਮਹੱਤਵ ਦਿੰਦੇ ਹਨ ।

ਨਤੀਜਾ ਇਹ ਹੋਇਆ ਕਿ ਮਨਪ੍ਰੀਤ ਦੀ ਅੱਜ ਆਪਣੀ ਅਲੱਗ ਪਾਰਟੀ ਹੈ ਅਤੇ ਉਹ ਅਕਾਲੀ  ਦਲ ਨੂੰ ਚੁਣੌਤੀ ਦੇ ਰਹੇ ਹਨ ।

ਉਸਦੇ  82 ਸਾਲਾ ਪਿਤਾ ਗੁਰਦਾਸ ਸਿੰਘ ਬਾਦਲ ਅਤੇ 84 ਸਾਲਾ ਤਾਇਆ  ਪ੍ਰਕਾਸ ਸਿੰਘ ਬਾਦਲ   ਲੰਬੀ ਵਿਧਾਨ  ਸਭਾ ਹਲਕੇ ਤੋਂ ਇੱਕ- ਦੂਜੇ ਨੂੰ ਹਰਾਉਣ ਵਿੱਚ ਕੋਈ  ਕਸਰ ਨਹੀਂ  ਛੱਡ ਰਹੇ ।

ਪਰ ਇਲਾਕੇ  ਦੇ ਲੋਕ ਦੋਵਾਂ ਭਾਈਆਂ ਦੇ ਪਿਆਰ ਕਿੱਸੇ ਅੱਜ ਵੀ ਬਿਆਨ ਕਰਦੇ ਨਹੀਂ  ਥੱਕਦੇ । ਇਸ  ਤੋਂ ਪਹਿਲਾਂ ਗੁਰਦਾਸ ਬਾਦਲ ਅਤੇ ਭਰਾ ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਪ੍ਰਚਾਰ ਲਈ ਅਹਿਮ ਭੂਮਿਕਾ ਨਿਭਾਉਂਦੇ ਸਨ ।

ਬਾਦਲ ਦੇ ਜਵਾਈ  ਆਦੇਸ਼ ਪ੍ਰਤਾਪ ਸਿੰਘ  ਕੈਰੋਂ  ਅਤੇ ਸੁਖਬੀਰ ਸਿੰਘ ਬਾਦਲ ਦੀ  ਮੈਂਬਰ ਪਾਰਲੀਮੈਂਟ   ਪਤਨੀ ਹਰਸਿਮਰਤ ਕੌਰ ਬਾਦਲ ਦੇ ਭਾਈ  ਬਿਕਰਮਜੀਤ ਸਿੰਘ ਮਜੀਠੀਆ ਨੂੰ ਅਕਾਲੀ ਦਲ ਦਾ ਟਿਕਟ ਮਿਲਿਆ ਹੈ।

ਪੰਜਾਬ ਦੀ  ਰਾਜਨੀਤੀ ਦੇ ਨਜ਼ਰ ਰੱਖਣ ਵਾਲੇ  ਚੰਡੀਗੜ੍ਹ ਸਥਿਤ ਵਿਕਾਸ ਅਤੇ ਸੰਚਾਰ ਸੰਸਥਾ ਦੇ ਨਿਰਦੇਸ਼ਕ ਪ੍ਰਮੋਦ ਕੁਮਾਰ ਦਾ ਕਹਿਣਾ ਹੈ ਕਿ ਕਾਂਗਰਸ ਵਿੱਚ ਪਰਿਵਾਰਵਾਦ ਕਾਫੀ ਪੁਰਾਣਾ ਅਤੇ ਪਰ ਅਕਾਲੀ ਦਲ ਦੇ ਪਰਿਵਾਰਵਾਦ ਦੇ ਕੁਝ ਇਤਿਹਾਸਕ ਕਾਰਨ ਹਨ ।

ਉਹ ਦੱਸਦੇ ਹਨ , “ ਅਕਾਲੀ ਦਲ  ਵਿੱਚ ਪਰਿਵਾਰਵਾਦ  ਵਧਾਉਣ  ਦੀ ਪਰੰਪਰਾ ਪਹਿਲਾਂ ਨਹੀ  ਸੀ । ਸਾਲ 1992 ਵਿੱਚ ਅਕਾਲੀ ਦਲ ਨੇ ਚੋਣਾਂ ਦਾ ਬਾਈਕਾਟ ਕੀਤਾ  ਸੀ ਜਿਸਦੀ ਵਜਾਅ ਨਹੀ ਪਾਰਟੀ ਵਿੱਚ ਨਵੇਂ ਲੋਕ ਘੱਟ ਸ਼ਾਂਮਿਲ ਹੋਏ ।ਜਿਸ ਕਾਰਨ ਪੁਰਾਣੇ ਲੋਕਾਂ ਦੀ  ਅਗਲੀ ਪੀੜੀ ਹੌਲੀ ਹੌਲੀ ਅੱਗੇ  ਰਾਜਨੀਤੀ ਵਿੱਚ ਆ ਗਈ । ਇਸ ਲਈ ਅੱਜ ਪਰਿਵਾਰਵਾਦ ਅਕਾਲੀ ਦਲ ਵਿੱਚ ਸਾਹਮਣੇ ਆ ਰਿਹਾ ਹੈ।

ਪਰ ਅਜਿਹਾ ਨਹੀਂ ਕਿ ਪੰਜਾਬ  ਦੇ ਚੋਣ  ਦੰਗਲ ਵਿੱਚ ਕੇਵਲ  ਬਾਦਲ  ਅਤੇ ਅਮਰਿੰਦਰ  ਦਾ ਪਰਿਵਾਰ ਹੀ ਸ਼ਾਮਿਲ ਹੈ।

ਸਾਬਕਾ ਮੁੱਖ ਮੰਤਰੀ  ਰਾਜਿੰਦਰ ਕੌਰ ਭੱਠਲ ਦੇ ਜਵਾਈ  ਬਿਕਰਮ ਸਿੰਘ ਬਾਜਵਾ ਨੂੰ ਕਾਂਗਰਸ ਦਾ ਟਿਕਟ ਮਿਲਿਆ ਹੈ।

ਉੱਥੇ   ਮਰਹੂਮ ਕਾਂਗਰਸੀ  ਮੁੱਖ ਮੰਤਰੀ  ਬੇਅੰਤ ਸਿੰਘ  ਦੇ ਪੋਤੇ  ਗੁਰਕੀਰਤ ਸਿੰਘ   ਨੂੰ ਕਾਂਗਰਸ ਦੀ ਟਿਕਟ ਮਿਲੀ ਹੈ ।

ਮਹਿਲਾ ਉਮੀਦਵਾਰ:  ਮਹਿਲਾ ਉਮੀਦਵਾਰਾਂ ਦੀ ਗੱਲ ਕਰੀਏ ਤਾਂ ਇਹ ਕਹਿਣਾ ਗਲਤ ਨਹੀਂ ਹੋਵੇਗਾ ਕਿ  ਇਹਨਾਂ ਵਿੱਚੋਂ ਜਿ਼ਆਦਾਤਰ ਕਿਸੇ ਨਾ ਕਿਸੇ ਪ੍ਰਭਾਵਸ਼ਾਲੀ ਨੇਤਾ ਦੀਆਂ ਰਿਸ਼ਤੇਦਾਰ ਹਨ ।

ਸਾਬਕਾ ਕ੍ਰਿਕਟਰ ਅਤੇ  ਬੀਜੇਪੀ ਸਾਂਸਦ  ਨਵਜੋਤ ਸਿੰਘ ਸਿੱਧੂ ਦੀ ਪਤਨੀ    ਡਾ:  ਨਵਜੋਤ ਕੌਰ  ਅੰਮ੍ਰਿਤਸਰ ਤੋਂ ਚੋਣ ਲੜ ਰਹੀ ਹੈ।     ਕਾਂਗਰਸ ਸਾਂਸਦ  ਪ੍ਰਤਾਪ ਸਿੰਘ ਬਾਜਵਾ ਦੀ ਪਤਨੀ ਚਰਨਜੀਤ ਕੌਰ ਕਾਦੀਆਂ ਤੋਂ ਉਮੀਦਵਾਰ ਹੈ।ਸੂਬਾ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸ਼ਮਸ਼ੇਰ ਸਿੰਘ ਦੂਲੋ ਦੀ ਪਤਨੀ ਹਰਬੰਸ ਕੌਰ ਦੂਲੋ  ਬੱਸੀ  ਪਠਾਣਾਂ ਤੋਂ  ਮੈਦਾਨ ਵਿੱਚ ਹਨ । ਜਲੰਧਰ ( ਪੂਰਬੀ) ਦੇ  ਉਮੀਦਵਾਦ  ਸੁਮਨ ਕੇਪੀ   ਕਾਂਗਰਸੀ ਸਾਂਸਦ  ਮਹਿੰਦਰ ਸਿੰਘ ਕੇਪੀ ਦੀ ਪਤਨੀ ਹੈ।ਕਾਂਗਰਸ ਵੱਲੋਂ ਮੁਕਤਸਰ ਤੋਂ ਉਮੀਦਵਾਰ  ਕਰਨ ਬਰਾੜ ਸਾਬਕਾ ਮੁੱਖ ਮੰਤਰੀ  ਹਰਚਰਨ ਸਿੰਘ ਬਰਾੜ ਦੀ ਨੂੰਹ  ਹੇ।ਅਕਾਲੀ ਨੇਤਾ  ਸਵ: ਗੁਰਚਰਨ ਸਿੰਘ ਟੋਹੜਾ ਦੀ ਲੜਕੀ  ਕੁਲਦੀਪ ਕੌਰ ਨੂੰ ਅਕਾਲੀ ਦਲ ਨੇ ਟਿਕਟ ਦਿੱਤਾ ਹੈ।ਸਾਰੀਆਂ ਪਾਰਟੀਆਂ   ਨਵੇ ਅਤੇ ਯੁਵਾ  ਲੋਕਾਂ ਨੂੰ ਰਾਜਨੀਤੀ  ਵਿੱਚ ਸ਼ਾਮਿਲ ਹੋਣ ਕਰਨ ਦੀ ਗੱਲ ਅਕਸਰ ਕਰਦੀਆਂ ਹਨ ਪਰ  ਜੇ ਸੱਚ ਵਿੱਚ ਐਸਾ ਕਰਨਾ ਚਾਹੁੰਦੇ ਹਨ ਤਾਂ  ਉਹਨਾਂ ਨੂੰ ਆਪਣੇ ਪਰਿਵਾਰ ਤੋਂ ਬਾਹਰ ਵੀ ਝਾਕਣਾ ਪਵੇਗਾ ।

ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸ. ਸੁਖਬੀਰ ਸਿੰਘ ਬਾਦਲ ਨੇ ਅੱਜ ਪੰਜਾਬ ਦੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੀ ਵੋਟ ਦਾ ਭੁਗਤਾਨ ਪੰਜਾਬ ਦੇ ਲੋਕ ਆਗੂ ਦੇ ਪੱਖ ’ਚ ਕਰਨ ਨਾ ਕਿ ਇੱਕ ਅਜਿਹੇ ਹੰਕਾਰੀ ਰਾਜੇ ਦੇ ਹੱਕ ’ਚ ਜੋ ਉਨ੍ਹਾਂ ਦੀਆਂ ਲੋੜਾਂ ਤੋਂ ਅਨਜਾਣ ਹੈ। ਉਨ੍ਹਾਂ ਕਿਹਾ ਕਿ ਇਕ ਪਾਸੇ ਚਾਰ ਵਾਰ ਮੁੱਖ ਮੰਤਰੀ ਰਹਿ ਚੁੱਕੇ ਪ੍ਰਕਾਸ਼ ਸਿੰਘ ਬਾਦਲ ਹਨ ਜਿੰਨ੍ਹਾ ਆਪਣਾ ਸਾਰਾ ਜੀਵਨ ਲੋਕਾਂ ਨੂੰ ਸਮੱਰਪਿਤ ਕੀਤੀ ਹੈ ਤਾਂ ਦੂਸਰੇ ਪਾਸੇ ਸੂਬਾ ਕਾਂਗਰਸ ਦਾ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਹੈ ਜੋ ਅਜੇ ਵੀ ਮਹਾਰਾਜਿਆਂ ਵਾਲੀ ਦੁਨੀਆ ’ਚ ਜੀਅ ਰਿਹਾ ਹੈ ਅਤੇ ਡੀਗਾਂ ਮਾਰ ਰਿਹਾ ਹੈ ਕਿ ਤਾਕਤ ਹਾਸਿਲ ਕਰਦਿਆਂ ਹੀ ਉਹ ਆਪਣੇ ਵਿਰੋਧੀਆਂ ਦੇ ਸਿਰ ਕਲਮ ਕਰ ਦੇਵੇਗਾ।

ਆਪਣੇ ਪਿਤਾ ਦੇ ਹੱਕ ’ਚ ਲੰਬੀ ਹਲਕੇ ਦੇ ਪਿੰਡਾਂ ਅਸਪਾਲ, ਕੱਟਿਆਂ ਵਾਲੀ, ਪੱਕੀ, ਗੁਰੂਸਰ, ਸ਼ਾਮਖੇੜਾ, ਕੋਲਿਆਂ ਵਾਲੀ, ਬੁਰਜ਼ਾਂ, ਡਬਵਾਲੀ ਢਾਬ, ਕਬਰਵਾਲਾ ਅਤੇ ਸਰਾਵਾਂ ਵਿਖੇ ਵੱਡੇ ਇਕੱਠਾਂ ਨੂੰ ਸੰਬੋਧਨ ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਪੰਜਾਬ ਇਸ ਸਮੇ ਦੌਰਾਹੇ ’ਤੇ ਹੈ ਅਤੇ ਲੋਕ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੀਤੇ 5 ਸਾਲਾਂ ’ਚ ਕਰਵਾਏ ਗਏ ਵਿਕਾਸ ਕਾਰਜ਼ਾਂ ਨੂੰ ਧਿਆਨ ’ਚ ਰੱਖ ਕੇ ਵੋਟ ਦੇਣ ਕਿਉਂਕਿ ਕੀਤਾ ਗਿਆ ਕੋਈ ਵੀ ਗਲਤ ਫੈਸਲਾ ਸੂਬੇ ਨੂੰ ਵਿਕਾਸ ਦੇ ਰਾਹ ਤੋਂ ਕੋਹਾਂ ਦੂਰ ਲੈ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸੂਬੇ ’ਚ ਲੋਕਾਂ ਨੂੰ ਇੰਨੀਆਂ ਸਹੂਲਤਾਂ ਮੁਹੱਈਆ ਕਰਨ ਦੇ ਨਾਲ-ਨਾਲ ਵਿਕਾਸ ’ਚ ਇਹ ਤੇਜ਼ੀ ਇਸੇ ਲਈ ਲਿਆਂਦੀ ਜਾ ਸਕੀ ਹੈ ਕਿ ਸੂਬੇ ਦੀ ਵਾਗਡੋਰ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਹੱਥ ’ਚ ਸੀ, ਜੋ ਕਿ ਸੂਬੇ ਦੀ ਸਮਾਜਕ ਤੇ ਆਰਥਕ ਸਥਿਤੀ ਨੂੰ ਭਲੀਭਾਂਤ ਜਾਣਦੇ ਹਨ। ਸ. ਬਾਦਲ ਨੇ ਕਿਹਾ ਕਿ ਇਹ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਜ਼ਮੀਨੀ ਹਕੀਕਤ ਨਾਲ ਜੁੜੀ ਪਹੁੰਚ ਹੀ ਹੈ ਜਿਸ ਨੇ ਸੂਬੇ ਦੇ ਆਮ ਤੇ ਗਰੀਬ ਲੋਕਾਂ ਦੀਆਂ ਲੋੜਾਂ ਨੂੰ ਧਿਆਨ ’ਚ ਰੱਖਦਿਆਂ ਨੀਤੀਆਂ ਘੜ੍ਹਨ ਦੇ ਨਾਲ-ਨਾਲ ਸੂਬੇ ਦੇ ਸੁਨਹਿਰੀ ਭੁਵਿੱਖ ਦਾ ਅਜਿਹਾ ਖਾਕਾ ਤਿਆਰ ਕੀਤਾ ਜੋ ਹਕੀਕਤ ’ਚ ਤਬਦੀਲ ਹੋ ਰਿਹਾ ਹੈ।

ਹਮੇਸ਼ਾਂ ਤੋਂ ਪੰਜਾਬ ਵਿਰੋਧੀ ਨੀਤੀਆਂ ਅਖਤਿਆਰ ਕਰਨ ਲਈ ਕਾਂਗਰਸ ’ਤੇ ਤਿੱਖਾ ਹਮਲਾ ਬੋਲਦਿਆਂ ਸ. ਬਾਦਲ ਨੇ ਕਿਹਾ ਕਿ ਸਿਰਫ ਕੈਪਟਨ ਅਮਰਿੰਦਰ ਸਿੰਘ ਹੀ ਆਮ ਲੋਕਾਂ ਪ੍ਰਤੀ ਢੀਠਪੁਣੇ ਤੇ ਹੰਕਾਰੀ ਰਵੱਈਏ ਲਈ ਨਹੀਂ ਜਾਣੇ ਜਾਂਦੇ ਬਲਕਿ ਸਮੁੱਚੀ ਕਾਂਗਰਸ ਪਾਰਟੀ ਹੀ ਆਮਤੌਰ ’ਤੇ ਲੋਕ ਵਿਰੋਧੀ ਅਤੇ ਖਾਸਕਰ ਪੰਜਾਬ ਵਿਰੋਧੀ ਹੈ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਨੇ ਜਿੱਥੇ ਮਤਰਈ ਮਾਂ ਦਾ ਰਵੱਈਆ ਅਪਣਾਉਂਦਿਆਂ ਹਿਮੇਸ਼ਾਂ ਪੰਜਾਬ ਦੇ ਆਰਥਕ ਹਿਤਾਂ ਨੂੰ ਅੱਖੋ-ਪਰੋਖੇ ਕੀਤਾ ਉਥੇ ਸੂਬੇ ਦੇ ਕੁਦਰਤੀ ਸਰੋਤਾਂ ਨੂੰ ਵੀ ਲੁੱਟਿਆ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਮੌਕਾ ਆ ਗਿਆ ਹੈ ਕਿ ਪੰਜਾਬ ਦੇ ਲੋਕ ਸੂਬੇ ਦੇ ਲੋਕਾਂ ਨਾਲ ਇਤਿਹਾਸਕ ਸਾਂਝ ਰੱਖਣ ਵਾਲੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਨੂੰ ਹੂੰਝਾ-ਫੇਰ ਜਿੱਤ ਦਿਵਾ ਕੇ ਕਾਂਗਰਸ ਨੂੰ ਇਤਿਹਾਸ ਦੇ ਕਿਸੇ ਕੂੜੇਦਾਨ ’ਚ ਸੁੱਟ ਦੇਣ।

ਚੋਣਾਂ ’ਚ ਕਿਸੇ ਤਰ੍ਹਾਂ ਦਾ ਵੀ ਕੁੱੜਤਣ ਦਾ ਵਿਰੋਧ ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਚੋਣ ਪ੍ਰਚਾਰ ਮੁੱਦਿਆਂ ’ਤੇ ਆਧਾਰਤ ਹੋਣਾ ਚਾਹੀਦਾ ਹੈ ਪਰ ਕੈਪਟਨ ਅਮਰਿੰਦਰ ਸਿੰਘ ਦੀ ਮੁੱਖ ਸਮੱਸਿਆ ਇਹ ਹੈ ਕਿ ਉਨ੍ਹਾਂ ਕੋਲ ਤੇ ਉਨ੍ਹਾਂ ਦੀ ਪਾਰਟੀ ਕੋਲ ਕੋਈ ਸਾਕਾਰਾਤਮਕ ਮੁੱਦਾ ਹੀ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਅਕਾਲੀ-ਭਾਜਪਾ ਸਰਕਾਰ ਨੇ 1 ਲੱਖ 15 ਹਜਾਰ ਨੌਜਵਾਨਾਂ ਨੂੰ ਪੂਰੇ ਪਾਰਦਰਸ਼ੀ ਢੰਗ ਨਾਲ ਰੋਜ਼ਗਾਰ ਮੁਹੱਈਆ ਕਰਵਾ ਕੇ ਬੀਤੀ ਕਾਂਗਰਸ ਸਰਕਾਰ ਦੇ ਨਾਕਾਬਲੀਅਤ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ। ਸ. ਬਾਦਲ ਨੇ ਕਿਹਾ ਕਿ ਸੂਬੇ ਨੂੰ ਬਿਜਲੀ ਉਤਪਾਦਨ ’ਚ ਸਰਪਲੱਸ ਸੂਬਾ ਬਨਾਉਣ ਲਈ ਪੁੱਟੇ ਗਏ ਕਦਮ, ਜ਼ਮੀਨਾਂ ਦੇ ਰਿਕਾਰਡਾਂ ਦਾ ਕੰਪਿਊਟਰੀਕਰਨ, ਪ੍ਰਸ਼ਾਸਨਕ ਸੁਧਾਰ, ਸੇਵਾ ਦਾ ਅਧਿਕਾਰ ਕਾਨੂੰਨ ਲਾਗੂ ਕਰਕੇ 67 ਸੇਵਾਵਾਂ ਨੂੰ ਸਮਾਬੱਧ ਕਰਨਾ, 6967 ਕਰੋੜ ਰੁਪਏ ਖਰਚ ਕਰਕੇ ਵਧੀਆ ਸੜਕਾਂ ਵਿਛਾਉਣਾ, 412 ਕਰੋੜ ਦੀ ਲਾਗਤ ਨਾਲ ਰੇਲਵੇ ਫਲਾਈਓਵਰ ਬਨਵਾਉਣ ਤੋਂ ਇਲਾਵਾ ਅਕਾਲੀ-ਭਾਜਪਾ ਵੱਲੋਂ ਵਿਕਾਸ ਕਾਰਜਾਂ ਦੀ ਲਾਈ ਗਈ ਲੜੀ ਨੇ ਕਾਂਗਰਸ ਨੂੰ ਬੌਂਦਲਾ ਕੇ ਰੱਖ ਦਿੱਤਾ ਹੈ ਅਤੇ ਹੁਣ ਇਸ ਪਾਰਟੀ ਦੇ ਆਗੂ ਗਾਲੀ-ਗਲੋਚ ਦੀ ਰਾਜਨੀਤੀ ’ਤੇ ਉ¤ਤਰ ਆਏ ਹਨ।

ਚੰਡੀਗੜ, 23 ਜਨਵਰੀ(ਗੁਰਪ੍ਰੀਤ ਸਿੰਘ ਮਹਿਕ) : ਭ੍ਰਿਸ਼ਟਾਚਾਰ ’ਤੇ ਅਕਾਲੀਆਂ ਦੇ ਅਸਹਿਣਸ਼ੀਲਤਾ ਸਬੰਧੀ ਦਾਅਵਿਆਂ ਨੂੰ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਨੇ ਇਨਾਂ ਚੋਣਾਂ ਦਾ ਸੱਭ ਤੋਂ ਵੱਡਾ ਮਜਾਕ ਕਰਾਰ ਦਿੱਤਾ ਹੈ। ਉਥੇ ਹੀ, ਪੰਜ ਸਾਲਾਂ ਤੱਕ ਹਵਾਈ ਕਿੱਲੇ ਬਣਾਉਣ ਦੀ ਕੋਸ਼ਿਸ਼ ਕਰਨ ਵਾਲੇ ਸੁਖਬੀਰ ਬਾਦਲ ਹਾਲੇ ਵੀ ਉਸੇ ਰਾਹ ’ਤੇ ਚੱਲ ਰਹੇ ਹਨ।

ਉਨਾਂ ਨੇ ਲੋਕ ਆਯੁਕਤ ਨੂੰ ਮਜਬੂਤ ਬਣਾਉਣ ਨੂੰ ਪੰਜਾਬ ਦੇ ਭਵਿੱਖ ਦਾ ਖਰੜਾ ਹੋਣ ਦਾ ਦਾਅਵਾ ਕਰਨ ਵਾਲੇ ਅਕਾਲੀਆਂ ਦੇ ਦਾਅਵਿਆਂ ਦੀ ਧੱਜੀਆਂ ਉਡਾਉਂਦੇ ਹੋਏ ਪੁੱਛਿਆ ਹੈ ਕਿ ਜੇਕਰ ਉਹ ਇਸ ਸਬੰਧ ’ਚ ਇੰਨੇ ਜਿਆਦਾ ਇਮਾਨਦਾਰ ਹਨ, ਤਾਂ ਪਿਛਲੇ ਪੰਜ ਸਾਲਾਂ ਦੌਰਾਨ ਉਨਾਂ ਨੇ ਕੋਈ ਕਦਮ ਕਿਉਂ ਨਹੀਂ ਚੁੱਕਿਆ। ਉਨਾਂ ਨੇ ਕਿਹਾ ਕਿ ਉਨਾਂ ਦੀ ਅਗਵਾਈ ਵਾਲੀ ਕਾਂਗਰਸ ਸਰਕਾਰ ਨੇ ਹੀ ਜਸਟਿਸ ਧਾਲੀਵਾਲ ਦੀ ਅਗਵਾਈ ਵਾਲੇ ਲੋਕਪਾਲ ਦੀ ਨਿਯੁਕਤੀ ਕੀਤੀ ਸੀ। ਮਗਰ ਅਕਾਲੀਆਂ ਨੇ ਸੱਤਾ ’ਚ ਆਉਂਦੇ ਸਾਰ ਹੀ ਇਸ ਸੰਸਥਾ ਨੂੰ ਕਮਜੋਰ ਬਣਾ ਦਿੱਤਾ। ਇਸ ਲੜੀ ਹੇਠ ਹੁਣ ਲੋਕਪਾਲ ਦੇ ਨਾਲ ਸਿਰਫ ਪੁਲਿਸ ਦਾ ਇਕ ਅਸਿਟੇਂਟ ਸਬ ਇੰਸਪੈਕਟਰ ਹੈ। ਉਸ ਤੋਂ ਇਲਾਵਾ ਲੋਕਪਾਲ ਦੇ ਕੋਲ ਕੋਈ ਹੋਰ ਸਟਾਫ ਨਹੀਂ ਹੈ। ਅਜਿਹੇ ’ਚ, ਕੀ ਅਕਾਲੀ ਇਕ ਏ.ਐਸ.ਆਈ ਦੇ ਨਾਲ ਲੋਕਪਾਲ ਨੂੰ ਮਜਬੂਤ ਕਰਨ ਦੀ ਗੱਲ ਆਖ ਰਹੇ ਹਨ?

ਉਨਾਂ ਨੇ ਕਿਹਾ ਕਿ ਅਕਾਲੀ ਭਾਜਪਾ ਸਰਕਾਰ ਸੁਤੰਤਰਤਾ ਤੋਂ ਬਾਅਦ ਪੰਜਾਬ ’ਚ ਹੁਣ ਤੱਕ ਦੀ ਸਭ ਤੋਂ ਭ੍ਰਿਸ਼ਟ ਸਰਕਾਰ ਹੈ। ਭ੍ਰਿਸ਼ਟਾਚਾਰ ’ਤੇ ਅਸਹਿਣਸ਼ੀਲਤਾ ਦੇ ਇਸਦੇ ਦਾਅਵੇ ਪੂਰੀ ਤਰਾਂ ਨਾਲ ਝੂਠ ਹਨ। ਇਕ ਭ੍ਰਿਸ਼ਟ ਪਾਰਟੀ ਤੇ ਗਠਜੋੜ ਭ੍ਰਿਸ਼ਟਾਚਾਰ ’ਤੇ ਅਸਹਿਣਸ਼ੀਲਤਾ ਦਾ ਦਾਅਵਾ ਨਹੀਂ ਕਰ ਸਕਦਾ ਹੈ।

ਕੈਪਟਨ ਅਮਰਿੰਦਰ ਨੇ ਪੰਜਾਬ ਨੂੰ ਪਾਵਰ ਸਰਪਲਸ ਬਣਾਉਣ ਤੇ 2013 ’ਚ ਸੂਬੇ ਵੱਲੋਂ ਬਿਜਲੀ ਦਾ ਨਿਰਯਾਤ ਕਰਨ ਨੂੰ ਸੁਖਬੀਰ ਪਾਸੋਂ ਦਿਨ ’ਚ ਦੇਖਿਆ ਗਿਆ ਸੁਫਨਾ ਕਰਾਰ ਦਿੱਤਾ ਹੈ। ਉਨਾਂ ਨੇ ਕਿਹਾ ਕਿ ਇਹ ਸੁਖਬੀਰ ਵੱਲੋਂ 2007 ’ਚ ਕੀਤੇ ਗਏ ਪੰਜਾਬ ਨੂੰ 2010 ਤੱਕ ਪਾਵਰ ਸਰਪਲਸ ਬਣਾਉਣ ਸਬੰਧੀ ਦਾਅਵੇ ਦੇ ਸਮਾਨ ਹੈ। ਕਿਉਂਕਿ ਹਾਲੇ ਵੀ ਸਾਡੇ ਉਦਯੋਗ ਹਫਤੇ ’ਚ ਤਿੰਨ ਦਿਨ ਦੇ ਪਾਵਰ ਕੱਟ ਦਾ ਸਾਹਮਣਾ ਕਰ ਰਹੇ ਹਨ, ਜਦਕਿ ਪੇਂਡੂ ਖੇਤਰ ਹਾਲੇ ਵੀ ਹਨੇਰੇ ’ਚ ਡੁੱਬੇ ਹੋਏ ਹਨ। ਅਜਿਹਾ ਪ੍ਰਤੀਤ ਹੁੰਦਾ ਹੈ, ਜਿਵੇਂ ਇਨਾਂ ਨੇ ਆਪਣੇ 2007 ਦੇ ਚੋਣ ਮਨੋਰਥ ਪੱਤਰ ਨੂੰ ਮੁੜ ਤੋਂ ਪੇਸ਼ ਕਰ ਦਿੱਤਾ ਹੈ।

ਇਸੇ ਤਰਾਂ, 2007 ’ਚ ਲੁਧਿਆਣਾ ’ਚ ਮੈਟਰੋ ਰੇਲ ਚਲਾਉਣ ਦਾ ਵਾਅਦਾ ਕੀਤਾ ਗਿਆ ਸੀ। ਉਸੇ ਵਾਅਦੇ ਨੂੰ ਦੁਹਰਾ ਕੇ ਇਕ ਵਾਰ ਫਿਰ ਤੋਂ ਤੋੜਨ ਲਈ ਮਜਬੂਤੀ ਨਾਲ ਸੰਕਲਪ ਲਿਆ ਗਿਆ ਹੈ।

ਪੀ.ਸੀ.ਸੀ ਪ੍ਰਧਾਨ ਨੇ ਅਕਾਲੀਆਂ ਦੀ ਚੰਡੀਗੜ ਤੇ ਪੰਜਾਬੀ ਭਾਸ਼ੀ ਖੇਤਰਾਂ ਨੂੰ ਹਰਿਆਣਾ ਤੋਂ ਵਾਪਿਸ ਲੈਣ ਸਬੰਧੀ ਵਚਨਬੱਧਤਾ ਦਾ ਹਾਸਾ ਉਡਾਉਂਦੇ ਹੋਏ ਕਿਹਾ ਕਿ ਇਹ ਪਿਛਲੇ 40 ਵਰਿਆਂ ਤੋਂ ਚੋਣਾਂ ਵੇਲੇ ਇਹੋ ਕਹਿੰਦੇ ਆ ਰਹੇ ਹਨ। ਮਗਰ ਸੱਤਾ ’ਚ ਆਉਣ ਤੋਂ ਬਾਅਦ ਇਸਦਾ ਵਰਨਣ ਕਰਨਾ ਭੁੱਲ ਜਾਂਦੇ ਹਨ।

ਉਥੇ ਹੀ, ਉਨਾਂ ਨੇ ਉਸ ਪਾਰਟੀ ਦੇ ਰੂਪ ’ਚ ਸੰਘਵਾਦ ਪ੍ਰਤੀ ਅਕਾਲੀਆਂ ਦੀ ਵਚਨਬੱਧਤਾ ’ਤੇ ਸਵਾਲ ਕੀਤਾ ਹੈ, ਜਿਹੜੀ ਮਜਬੂਤ ਕੇਂਦਰ ’ਤੇ ਵਿਸ਼ਵਾਸ ਰੱਖਣ ਵਾਲੇ ਦੱਖਣ ਪੰਥੀ ਧੜੇ ਭਾਰਤੀਆ ਜਨਤਾ ਪਾਰਟੀ ’ਤੇ ਪੂਰੀ ਤਰਾਂ ਨਾਲ ਨਿਰਭਰ ਕਰਦੀ ਹੈ। ਅਜਿਹੇ ’ਚ ਅਕਾਲੀ ਦਲ ਸਿਰਫ ਇੱਛਾ ਰੱਖ ਸਕਦਾ ਹੈ, ਮਗਰ ਕੁਝ ਕਰ ਨਹੀਂ ਸਕਦਾ। ਇਨਾਂ ਨੂੰ ਆਪਣੇ ਮਨੋਰਥ ਪੱਤਰ ’ਚ ਉਸਨੂੰ ਜੋੜਨਾ ਨਹੀਂ ਚਾਹੀਦਾ ਹੈ, ਜਿਸ ਲਈ ਇਨਾਂ ਕੋਲ ਇੱਛਾ ਸ਼ਕਤੀ ਹੀ ਨਹੀਂ ਹੇ। ਉਨਾਂ ਨੇ ਇਸਨੂੰ ਇਕ ਨਿਰਾਸ਼ ਪਾਰਟੀ ਦਾ ਧੌਖਾ ਦੇਣ ਵਾਲਾ ਦਾਅਵਾ ਕਰਾਰ ਦਿੱਤਾ ਹੈ। ਜਿਨਾਂ ਅਕਾਲੀਆਂ ਦਾ ਸੱਤਾ ਹਾਸਿਲ ਕਰਨ ਲਈ ਮੁੱਦਿਆਂ ਨੂੰ ਦਿਲ ਦੇ ਕੋਲ ਰੱਖਣ ਦਾ ਦਾਅਵਾ ਕਰਨਾ ਅਤੇ ਬਾਅਦ ਵਿੱਚ ਉਨਾਂ ਨੂੰ ਠੰਡੇ ਬਸਤੇ ’ਚ ਪਾਉਣ ਦਾ ਰਿਕਾਰਡ ਹੈ।

ਸਾਬਕਾ ਮੁੱਖ ਮੰਤਰੀ ਨੇ ਅਕਾਲੀਆਂ ਦੇ ਪਨਬੱਸ ਤੇ ਪੈਪਸੂ ਦੇ ਪੂਰੇ ਬੇੜੇ ਨੂੰ ਏਅਰਕੰਡੀਸ਼ਨਡ ਬੱਸਾਂ ’ਚ ਤਬਦੀਲ ਕਰਨ ਦੇ ਦਾਅਵਿਆਂ ’ਤੇ ਚੁਟਕੀ ਲੈਂਦੇ ਹੋਏ ਕਿਹਾ ਕਿ ਇਹ ਇਕ ਹੋਰ ਮਜਾਕ ਦੀ ਤਰਾਂ ਹੈ। ਪੰਜਾਬ ਦੇ ਲੋਕ ਚੰਗੀ ਤਰਾਂ ਜਾਣਦੇ ਹਨ ਕਿ ਕਿਵੇਂ ਇਨਾਂ ਨੇ ਦੋਵੇਂ ਪਨਬੱਸ ਤੇ ਪੈਪਸੂ ਨਾਲ ਧੱਕਾ ਕਰਦੇ ਹੋਏ ਸੂਬੇ ਦੀ ਟਰਾਂਸਪੋਰਟ ਨੀਤੀ ’ਚ ਚਲਾਕੀ ਨਾਲ ਫੇਰਬਦਲ ਕੀਤਾ। ਜਦਕਿ ਹੁਣ ਇਹ ਇਨਾਂ ਬੱਸਾਂ ਨੂੰ ਏ.ਸੀ ਬਣਾਉਣ ਦਾ ਸੁਫਨਾ ਵੇਚਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਹ ਪਹਿਲਾਂ ਤੋਂ ਭੁੱਖ ਦੇ ਚਲਦੇ ਮਰ ਚੁੱਕੇ ਆਦਮੀ ਨੂੰ ਭੋਜਨ ਦਾ ਵਾਅਦਾ ਕਰਨ ਦੇ ਸਮਾਨ ਪ੍ਰਤੀਤ ਹੁੰਦਾ ਹੈ। ਪਨਬੱਸ ਤੇ ਪੈਪਸੂ ਦੀ ਹਾਲਤ ਵੀ ਅਜਿਹੀ ਹੀ ਬਣ ਚੁੱਕੀ ਹੈ।

ਕੈਪਟਨ ਅਮਰਿੰਦਰ ਨੇ ਕਿਹਾ ਕਿ ਉਨਾਂ ਨੂੰ ਅਕਾਲੀ ਮਨੋਰਥ ਪੱਤਰ ਨੂੰ ਲੈ ਕੇ ਕਿਸੇ ਵੀ ਤਰਾਂ ਦੀ ਹੈਰਾਨੀ ਨਹੀਂ ਹੈ, ਕਿਉਂਕਿ ਉਨਾਂ ਨੂੰ ਇਸ ਤੋਂ ਕੁਝ ਬੇਹਤਰੀ ਦੀ ਉਮੀਦ ਵੀ ਨਹੀਂ ਸੀ। ਇਹ ਵੈਚਾਰਿਕ ਦ੍ਰਿਸ਼ਟੀ ਨਾਲ ਪੂਰੀ ਤਰਾਂ ਨਾਲ ਕੰਗਾਲ ਹਨ ਅਤੇ ਸਿਰਫ ਸਾਡੇ ਮਨੋਰਥ ਪੱਤਰ ਦੇ ਆਉਣ ਦਾ ਇੰਤਜਾਰ ਕਰ ਰਹੇ ਸਨ। ਇਸ ਲੜੀ ਹੇਠ ਇਨਾਂ ਨੇ ਸਾਡੇ ਮਨੋਰਥ ਪੱਤਰ ਨੂੰ ਪੜਨ ’ਚ ਸਿਰਫ ਛੇ ਦਿਨ ਲਗਾਏ ਤੇ ਹੁਣ ਆਪਣਾ ਉਤਾਰ ਦਿੱਤਾ, ਜਦਕਿ ਸਾਨੂੰ ਤਿਆਰ ਕਰਨ ਵਿੱਚ ਛੇ ਮਹੀਨੇ ਤੋਂ ਵੱਧ ਸਮਾਂ ਲੱਗਿਆ।

ਚੰਡੀਗੜ•, 23 ਜਨਵਰੀ (ਗੁਰਪ੍ਰੀਤ ਮਹਿਕ) : ਸ਼੍ਰੋਮਣੀ ਅਕਾਲੀ ਦਲ ਵੱਲੋ ਸੌਦਾ ਸਾਧ ਤੋ ਮਦਦ ਲੈਣ ਦੇ ਮਾਮਲੇ ਵਿਚ ਅੱਜ ਪੰਜਾਬ ਦੇ ਮੁੱਖ ਮੰਤਰੀ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਸਰਪ੍ਰਸਤ ਸ: ਪਰਕਾਸ਼ ਸਿੰਘ ਬਾਦਲ ਬੇਨਕਾਬ ਹੋ ਗਏ।

ਪੱਤਰਕਾਰਾਂ ਨਾਲ ਭਾਜਪਾ ਨੇਤਾ ਓਮਾ ਭਾਰਤੀ, ਸੀਨੀਅਰ ਭਾਜਪਾ ਨੇਤਾ ਬਲਰਾਮ ਜੀ ਦਾਸ ਟੰਡਨ ਦੀ ਹਾਜਰੀ ਵਿਚ ਗੱਲਬਾਤ ਦੌਰਾਨ ਪਹਿਲਾਂ ਤਾਂ ਸ: ਬਾਦਲ ਨੇ ਜਮ ਕੇ ਪ੍ਰਧਾਨ ਮੰਤਰੀ ਡਾ ਮਨਮੋਹਨ ਸਿੰਘ ਅਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਵਿਰੁੱਧ ਗੁੱਸਾ ਕੱਢਿਆ। ਉਨਾਂ ਡਾ ਮਨਮੋਹਨ ਸਿੰਘ ਵੱਲੋ ਹਾਲ ਹੀ ਵਿਚ ਪੰਜਾਬ ਦੌਰਾ ਦੌਰਾਨ ਸ਼੍ਰੋਮਣੀ ਅਕਾਲੀ ਦਲ ਭਾਜਪਾ ਗਠਜੋੜ ਵੱਲੋ ਕੀਤੀ ਆਲੋਚਨਾ ਬਾਰੇ ਆਪਣਾ ਪੱਖ ਰੱਖਿਆ। ਸ: ਬਾਦਲ ਸਾਰੇ ਸਵਾਲਾਂ ਦਾ ਆਸਾਨੀ ਨਾਲ ਜਵਾਬ ਦਿੰਦੇ ਰਹੇ, ਪ੍ਰੰਤੂ ਉਹ ਉਸ ਸਮੇਂ ਕਸੂਤੀ ਸਥਿਤੀ ਵਿਚ ਫਸ ਗਏ ਜਦੋ ਇਸ ਪੱਤਰਕਾਰ ਨੇ ਸ: ਬਾਦਲ ਨੂੰ ਉਨਾਂ ਨੂੰ ਪਾਰਟੀ ਵੱਲੋ ਅਗਾਮੀ ਵਿਧਾਨ ਸਭਾ ਚੌਣਾਂ ਵਿਚ ਸੌਦਾ ਸਾਧ ਤੋ ਮਦਦ ਲੈਣ ਦੇ ਸਟੈਂਡ ਬਾਰੇ ਪੁੱਛਿਆ। ਸ: ਬਾਦਲ ਸਵਾਲ ਟਾਲਦੇ ਰਹੇ। ਜਦੋ ਇਸ ਪੱਤਰਕਾਰ ਨੇ ਸ: ਬਾਦਲ ਨੂੰ ਮੁੜ ਇਹ ਪੁੱਛਿਆ ਕਿ ਅਕਾਲ ਤਖਤ ਸਾਹਿਬ ਵੱਲੋ ਸੌਦਾ ਸਾਧ ਵਿਰੁੱਧ ਹੁਕਮਨਾਮਾ ਜਾਰੀ ਹੋਇਆ ਹੈ ਅਤੇ ਅਕਾਲ ਤਖਤ ਸਾਹਿਬ ਦੇ ਮੁੱਖ ਸੇਵਾਦਾਰ ਨੇ ਸੌਦਾ ਸਾਧ ਨਾਲ ਸਿੱਖਾਂ ਨੂੰ ਹਰ ਤਰਾਂ ਦੇ ਸੰਬੰਧ ਤੋੜਣ ਲਈ ਕਿਹਾ ਹੈ ਅਤੇ ਇਹ ਰਿਪੋਰਟਾਂ ਪ੍ਰਾਪਤ ਹੋ ਰਹੀਆਂ ਹਨ ਕਿ ਹੋਰਨਾਂ ਸਿਆਸੀ ਦਲਾਂ ਵਾਂਗ ਉਨਾ ਸ: ਬਾਦਲ ਦੀ ਪਾਰਟੀ ਦੇ ਉਮੀਦਵਾਰ ਵੀ ਸੌਧਾ ਸਾਧ ਤੋ ਮਦਦ ਲੈਣ ਜਾ ਰਹੇ ਹਨ, ਤਾਂ ਸ: ਬਾਦਲ ਨੇ ਕਿਹਾ ਕਿ ਇਹ ਡੇਰੇ ਨੇ ਦੇਖਣਾ ਹੈ ਕਿਸ ਦੀ ਮਦਦ ਕਰਨੀ ਹੈ ਕਿਸ ਦੀ ਨਹੀਂ। ਉਨਾਂ ਦਾ ਇਸ ਗੱਲ ਨਾਲ ਕੋਈ ਸੰਬੰਧ ਨਹੀਂ। ਸ: ਬਾਦਲ ਇਸ ਸਵਾਲ ਤੋ ਇੰਨੇ ਤੰਗ ਮਹਿਸੂਸ ਹੋਏ ਕਿ ਉਹ ਉਠ ਖੜੇ ਹੋਏ ਅਤੇ ਦੂਜੇ ਸਮਾਗਮ ਵਿਚ ਸ਼ਿਰਕਤ ਕਰਨ ਲਈ ਤੁਰ ਪਏ। ਸ: ਬਾਦਲ ਵੱਲੋ ਧਾਰੀ ਭ੍ਯੇਦਭਰੀ ਚੁੱਪੀ ਨੇ ਸ: ਬਾਦਲ ਅਤੇ ਉਨਾਂ ਦੀ ਪਾਰਟੀ ਦਾ ਅਸਲ ਚੇਹਰਾ ਬੇਨਕਾਬ ਕਰ ਦਿੱਤਾ ਹੈ।

ਸ: ਬਾਦਲ ਅਤੇ ਭਾਜਪਾ ਦੀ ਸੀਨੀਅਰ ਨੇਤਾ ਓਮਾ ਭਾਰਤੀ ਨੇ ਅੱਜ ਸਰਹਿੰਦ ਵਿਖੇ ਪਾਰਟੀ ਦੇ ਉਮੀਦਵਾਰ ਪ੍ਰੋ: ਪ੍ਰੇਮ ਸਿੰਘ ਚੰਦੂਮਾਜਰਾ ਦੇ ਹੱਕ ਵਿਚ ਪ੍ਰਚਾਰ ਕੀਤਾ।  ਭਾਵੇਂ ਕਿ ਰੈਲੀ ਵਿਚ ਕਾਫੀ ਇੱਕਠ ਸੀ ਅਤੇ ਐਡਵੋਕੇਟ ਨਰਿੰਦਰ ਸਿੰਘ ਟਿਵਾਣਾ, ਜਰਨੈਲ ਸਿੰਘ ਹਿੰਦੂਪੁਰ ਕਾਂਗਰਸ ਛੱਡ ਕੇ ਅਤੇ ਮਹਿੰਦਰ ਸਿੰਘ ਆਦਿ ਸ਼੍ਰੋਮਣੀ ਅਕਾਲੀ ਦਲ ਅਮ੍ਰਿਤਸਰ ਛੱਡ ਕੇ ਅਤੇ ਕੁਝ ਨੇਤਾ ਪੀਪਲਜ ਪਾਰਟੀ ਆਫ ਪੰਜਾਬ ਛੱਡ ਕੇ ਸ਼੍ਰੋਮਣੀ ਅਕਾਲੀ ਦਲ ਵਿਚ ਸ਼ਾਮਲ ਹੋਏ , ਪ੍ਰੰਤੂ ਇਸ ਦਸ ਬਾਵਜੂਦ ਸ: ਬਾਦਲ ਤੇ ਚਿਹਰੇ ਤੇ ਚਿੰਤਾ ਸਾਫ ਝਲਕ ਰਹੀ ਹੈ। ਸ: ਬਾਦਲ ਨੇ ਸਟੇਜ ਤੇ ਬੈਠੇ ਹੀ ਸ਼੍ਰੋਮਣੀ ਅਕਾਲੀ ਦਲ ਦੇ ਅੱਜ ਜਾਰੀ ਹੋਏ ਚੌਣ ਮਨੋਰਥ ਪੱਤਰ ਦੀ ਕਾਪੀ ਦੇਖੀ।

ਰੈਲੀ ਦੌਰਾਨ ਸ: ਬਾਦਲ ਨੇ ਆਪਣੀ ਪਾਰਟੀ ਦੀ ਪ੍ਰਾਪਤੀਆ ਦਾ ਜਿਕਰ ਕੀਤਾ ਅਤੇ ਲੋਕਾਂ ਨਾਲ ਵਾਅਦਾ ਕੀਤਾ ਕਿ ਜੇ ਸੂਬੇ ਵਿਚ ਸ਼੍ਰੋਮਣੀ ਅਕਾਲੀ ਦਲ ਦੀ ਸਰਕਾਰ ਬਣੀ ਅਤੇ ਪ੍ਰੋ: ਪ੍ਰੇਮ ਸਿੰਘ ਚੰਦੂਮਾਜਰਾ ਜਿੱਤੇ ਤਾਂ ਉਨਾਂ ਨੂੰ ਕੈਬਨਿਟ ਮੰਤਰੀ ਬਣਾਇਆ ਜਾਵੇਗਾ। ਉਨਾਂ ਆਪਣੇ ਭਾਸ਼ਨ ਵਿਚ ਸਰਹਿੰਦ ਦੇ ਮੌਜੂਦਾ ਵਿਧਾਇਕ ਸ: ਦੀਦਾਰ ਸਿੰਘ ਭੱਟੀ ਦੀ ਵੀ ਨਿਖੇਧੀ ਕੀਤੀ ਅਤੇ ਕਿਹਾ ਕਿ ਪਾਰਟੀ ਨੇ ਸ: ਭੱਟੀ ਅਤੇ ਉਨਾਂ ਦੇ ਪੁੱਤਰ ਨੂੰ ਕਾਫੀ ਮਾਨ ਸਨਮਾਨ ਦਿੱਤਾ, ਪ੍ਰੰਤੂ ਫੇਰ ਵੀ ਉਹ ਪਾਰਟੀ ਛੱਡ ਕੇ ਪੀਪਲਜ ਪਾਰਟੀ ਆਫ ਪੰਜਾਬ ਵੱਲੋ ਚੌਣ ਲ੍ੜ ਰਹੇ ਹਨ, ਜਿਸ ਪਾਰਟੀ ਦੇ ਉਮੀਦਵਾਰਾਂ ਦੀ ਪਾਰਟੀ ਵਿਚੋ ਜਮਾਨਤ ਜਬਤ ਹੋ ਜਾਵੇਗੀ। ਸਟੇਜ ਤੋ ਬੋਲਦੇ ਹੋਏ ਸੀਨੀਅਰ ਅਕਾਲੀ ਨੇਤਾ ਮੰਜੂ ਕਰੇਸ਼ੀ ਨੇ ਕਾਂਗਰਸ ਦੀ ਨਿੇਖਧੀ ਕੀਤੀ। ਸ: ਕਰਨੈਲ ਸਿੰਘ ਪੰਜੋਲੀ ਨੇ ਸ: ਦੀਦਾਰ ਸਿੰਘ ਭੱਟੀ ਦਾ ਸਾਥ ਦੇਣ ਵਾਲੇ ਸ਼੍ਰੋਮਣੀ ਅਕਾਲੀ ਦਲ ਵਿਚੋ ਕੱਢੇ ਗਏ ਉਮੀਦਵਾਰਾਂ ਦਾ ਐਲਾਨ ਸਟੇਜ ਤੋ ਕੀਤਾ। ਭਾਜਪਾ ਦੇ ਜਿਲਾ ਪ੍ਰਧਾਨ ਐਸ ਐਨ ਸ਼ਰਮਾ ਨੇ ਕਿ ਸਪਸ਼ਟ ਕੀਤਾ ਕਿ ਉਨਾਂ ਦੀ ਪਾਰਟੀ ਪ੍ਰੋ: ਚੰਦੂਮਾਜਰਾ ਨਾਲ ਖੜੀ ਹੈ ਅਤੇ ਜੇ ਕਈ ਵੀ ਭਾਜਪਾ ਨਾਲ ਸ: ਭੱਟੀ ਨਾਲ ਚੱਲੇਗਾ ਉਸ ਵਿਰੁੱਧ ਅਨੁਸ਼ਾਸ਼ਨੀ ਕਾਰਵਾਈ ਕੀਤੀ ਜਾਵੇਗੀ।

ਓਮਾ ਭਾਰਤੀ ਨੇ ਕਿਹਾ ਕਿ ਕਾਂਗਰਸ ਦੇ ਭ੍ਰਿਸ਼ਟ ਚਿਹਰੇ ਕਾਰਨ ਹੁਣ ਇਸਦਾ ਦੇਸ਼ ਵਿੱਚੋਂ ਸਫਾਇਆ ਹੋਣਾ ਪੱਕਾ ਹੈ ਉਨਾਂ ਕਿਹਾ ਕਿ ਪੰਜਾਬ ਸਮੇਤ ਬਾਕੀ ਸੂਬਿਆਂ ਵਿੱਚ ਵੀ ਭਾਜਪਾ ਅਤੇ ਇਸ ਦੇ ਸਹਿਯੋਗੀ ਦਲਾਂ ਦੀਆਂ ਸਰਕਾਰਾਂ ਦਾ ਗਠਨ ਹੋਣਾ ਨਿਸ਼ਚਿਤ ਹੈ । ਉਨਾਂ ਕਿਹਾ ਕਿ ਪੰਜਾਬ ਵਿੱਚ ਸੱਤਾ ਵਿਰੋਧੀ ਮੁੱਦੇ ਦਾ ਕੋਈ ਨਾਮ ਨਿਸ਼ਾਨ ਨਹੀਂ  ਹੈ ਅਤੇ ਸੂਬੇ ਵਿੱਚ ਆਉਣ ਵਾਲੀ ਸਰਕਾਰ ਅਕਾਲੀ ਭਾਜਪਾ ਗਠਜੋੜ ਸਰਕਾਰ ਦੀ ਹੀ ਹੋਵੇਗੀ। ਉਨਾਂ ਕਿਹਾ ਕਿ ਕਾਂਗਰਸ  ਦਾ ਅੰਗ ਅੰਗ ਭ੍ਰਿਸ਼ਟਾਚਾਰ ਵਿੱਚ ਡੁੱਬ ਚੁੱਕਿਆ ਹੈ ਅਤੇ ਇਹ ਹੁਣ ਪੂਰੀ ਤਰਾਂ ਆਪਣੇ  ਰਾਹ ਤੋਂ ਭਟਕ ਚੁੱਕੀ ਹੈ ਉਨਾਂ  ਪਿਛਲੇ ਦਿਨਾਂ ਦੌਰਾਨ ਪੰਜਾਬ ਫੇਰੀ ’ਤੇ  ਆਈ ਕਾਂਗਰਸ ਦੀ ਪ੍ਰਧਾਨ ਸ਼੍ਰੀਮਤੀ ਸੋਨੀਆ ਗਾਂਧੀ ਅਤੇ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਵੱਲੋਂ ਦਿੱਤੇ ਬਿਆਨਾਂ ’ਤੇ ਹੈਰਨੀ ਪ੍ਰਗਟ ਕਰਦਿਆਂ ਕਿਹਾ ਕਿ ਜਿਸ ਪਾਰਟੀ ਦੇ ਸੀਨੀਅਰ ਆਗੂਆਂ ਕੋਲ ਸੂਬੇ ਦੇ ਭਵਿੱਖ ਲਈ ਕੋਈ ਯੋਜਨਾ ਨਾ ਹੋਵੇ ਅਤੇ ਜਿਹੜੇ ਸਿਰਫ਼ ਆਪਣੀ ਸੂਬਾ ਇਕਾਈ ਦੇ ਆਮ ਵਰਕਰਾਂ ਵੱਲੋਂ ਲਿਖੇ ਭਾਸ਼ਣ ਹੀ ਪੜ ਕੇ ਸੁਣਾਉਣ ਨੂੰ  ਪਹਿਲ ਦਿੰਦੇ ਹੋਣ, ਉਨਾਂ ਤੋਂ ਦੇਸ਼ ਜਾਂ ਸੂਬੇ ਦੇ ਵਿਕਸ ਦੀ ਕੋਈ ਕਾਮਨਾ ਹੀ ਨਹੀਂ ਕੀਤੀ ਜਾ ਸਕਦੀ ਉਨਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਅਤੇ ਸ਼੍ਰੀਮਤੀ ਗਾਂਧੀ ਦਾ ਇਹ ਕਹਿਣਾ ਬਿਲਕੁੱਲ ਵਾਜ਼ਬ ਨਹੀਂ ਹੈ ਕਿ ਪਿਛਲੇ ਪੰਜ ਸਾਲ ਦੌਰਾਨ ਸੂਬਾ ਵਿਕਾਸ ਪੱਖੋਂ ਪੱਛੜਿਆ ਹੈ ਉਨਾਂ ਕਿਹਾ ਕਿ ਇਹ ਬੱਚਾ ਬੱਚਾ ਜਾਣਦਾ ਹੈ ਕਿ ਅਕਾਲੀ ਭਾਜਪਾ ਸਰਕਾਰ ਦੇ ਪੰਜ ਸਾਲ ਦੇ ਰਾਜਭਾਗ ਦੌਰਾਨ ਪੰਜਾਬ ਨੇ ਜਿਸ ਤਰਾਂ ਸਰਵਪੱਖੀ ਵਿਕਾਸ ਕਰਕੇ ਇੱਕ ਨਵੀਂ ਪੁਲਾਂਘ ਪੁੱਟੀ ਹੈ ਅਜਿਹਾ ਕਾਂਗਰਸ ਦੇ ਰਾਜ ਭਾਗ ਦੌਰਾਨ ਪਿਛਲੇ ਪੰਜਾਹ ਸਾਲ ਵਿੱਚ ਵੀ ਨਹੀਂ ਹੋ ਸਕਿਆ

ਉਨਾਂ ਕਿਹਾ ਕਿ ਪ੍ਰਧਾਨ  ਮੰਤਰੀ ਦਾ ਇਹ ਕਹਿਣਾ ਕਿ ਪੰਜ ਸਾਲ  ਦੌਰਾਨ ਪੰਜਾਬ ਪੱਛੜ ਗਿਆ ਹੈ ਇੱਕ ਪੱਖ  ਤੋਂ ਸਹੀ ਵੀ ਹੈ, ਕਿਉਂਕਿ ਕੇਂਦਰ  ਸਰਕਾਰ ਨੇ ਇਸ ਨਾਲ ਜਿਸ ਤਰਾਂ ਦਾ ਮਤਰੇਆ ਸਲੂਕ ਕੀਤਾ ਹੈ ਇਸ ਕਾਰਨ ਕੇਂਦਰ ਦੀਆਂ ਨਜ਼ਰਾਂ ਵਿੱਚ ਇਹ ਸੱਚਮੁੱਚ ਹੀ ਪਛੜਿਆ ਹੋ ਸਕਦਾ ਹੈ ਪਰ ਅਸਲ ਵਿੱਚ ਪੰਜਾਬ ਦੇ ਬਹੁ ਪੱਖੀ ਸ਼ਖਸ਼ੀਅਤ ਦੇ ਮਾਲਕ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਹੇਠ ਗਠਜੋੜ ਸਰਕਾਰ ਨੇ ਕੇਂਦਰ ਸਰਕਾਰ ਦੀ ਭੇਦਭਾਵ ਵਾਲੀ ਨੀਤੀ ਦੇ ਬਾਵਜੂਦ ਪੰਜਾ ਸਾਲ ਦੌਰਾਨ ਵੱਡੀਆਂ ਪੁਲਾਂਘਾ ਪੁੱਟ ਕੇ ਸੂਬੇ ਦੇ ਹਿੱਤਾਂ ਦੀ ਵਿਰੋਧੀ ਕਾਂਗਰਸ ਸਰਕਾਰ ਨੂੰ ਇੱਕ ਵੱਡੀ ਚੁਣੌਤੀ ਦੇ ਦਿੱਤੀ ਹੈ।

ਅਕਾਲੀ ਦਲ ਬਾਦਲ ਨੇ ਆਪਣੇ ਹਾਲ ਹੀ ਵਿਚ ਜਾਰੀ ਕੀਤੇ ਚੋਣ ਮੈਨੀਫੈਸਟੋ ਵਿਚ ਆਪਣੀ ਸਰਕਾਰ ਆਉਣ ਤੇ ਵਿਦਿਆਰਥੀਆਂ ਨੂੰ ਮੁਫਤ ਲੈਪਟਾਪ ਦੇਣ ਦਾ ਜੋ ਵਾਅਦਾ ਕੀਤਾ ਹੈ, ਉੁਸ ਪ੍ਰਤੀ ਲੋਕਾਂ ਨੇ ਆਪਣਾ ਕਈ ਤਰਾਂ ਦਾ ਪ੍ਰਤੀਕਰਮ ਜਾਹਿਰ ਕੀਤਾ ਹੈ। ਇਕ ਰਾਜਨੀਤਕ ਵਿਸ਼ਲੇਸ਼ਕ ਨੇ ਵਿਅੰਗ ਕੱਸਦਿਆਂ ਕਿਹਾ ਕਿ ਅਧਿਆਪਕਾਂ ਦੀਆਂ ਉਂਜ ਤਾਂ ਤਨਖਾਹਾਂ ਵਿਚ ਵਾਧਾ ਕਰ ਦਿੱਤਾ ਗਿਆ ਪਰ ਪਿਛਲੇ 9 ਮਹੀਨਿਆਂ ਤੋ ਲੈ ਕੇ ਅਧਿਆਪਕਾਂ ਨੂੰ ਤਨਖਾਹਾਂ ਨਹੀਂ ਦਿੱਤੀਆਂ ਗਈਆਂ, ਜਿਸ ਕਰਕੇ ਅਧਿਆਪਕ ਫਾਕੇ ਕੱਟ ਰਹੇ ਹਨ ਅਤੇ ਦੁਕਾਨਦਾਰਾਂ ਨੇ ਉਨਾਂ ਨੂੰ ਉਧਾਰ ਸੌਦਾ ਦੇਣਾ ਵੀ ਬੰਦ ਕਰ ਦਿੱਤਾ ਹੈ ਅਤੇ ਬਾਦਲ ਸਰਕਾਰ ਨੇ ਉਂਜ ਕਰੋੜਾਂ ਦੀਆਂ ਗਰਾਂਟਾਂ ਪਿੰਡਾਂ, ਸ਼ਹਿਰਾਂ ਚ ਵੰਡਕੇ ਵਿਕਾਸ ਦਾ ਨਾਹਰਾ ਲਾਇਆ ਹੈ। ਦੂਜੇ ਪਾਸੇ ਹੁਣ ਮੁਫਤ ਲੈਪਟਾਪ ਵੰਡਣ ਦੀਆਂ ਹਾਸੋਹੀਣੀਆਂ ਗੱਲਾਂ ਕਰ ਰਹੇ ਹਨ। ਉਨ•ਾਂ ਇਹ ਵੀ ਸਵਾਲ ਕੀਤਾ ਕਿ ਮਾਈ ਭਾਗੋ ਸਕੀਮ ਤਹਿਤ ਵੰਡੇ ਸਾਈਕਲਾਂ ਚੋਂ  9 ਕਰੋੜ ਛਕੇ ਹਨ ਹੁਣ ਲੈਪਟਾਪ ਚੋਂ ਤਾਂ ਅੰਕੜੇ ਅਰਬਾਂ ਚ ਹੀ ਜਾਣਗੇ।

ਤੱਕੜੀ ਤੇਰਾ ਤੇਰਾ ਨਹੀਂ ਮੇਰਾ ਮੇਰਾ ਤੋਲਦੀ

ਵਿਧਾਨ ਸਭਾ ਹਲਕਾ ਜਲਾਲਾਬਾਦ ਤੋਂ ਸੁਖਬੀਰ ਬਾਦਲ ਦੇ ਮੁਕਾਬਲੇ ਚ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹੰਸ ਰਾਜ ਜੋਸਨ ਨੇ ਆਪਣੇ ਹਲਕੇ ਦੇ ਕਈ ਪਿੰਡਾਂ ਵਿਚ ਚੋਣ ਪ੍ਰਚਾਰ ਕਰਦਿਆਂ ਕਿਹਾ ਕਿ ਪੰਜ ਸਾਲਾਂ ਚ ਤੁਸੀਂ ਵੇਖ ਲਿਆ ਹੈ ਕਿ ਅਕਾਲੀਆਂ ਨੇ ਤੁਹਾਡਾ ਕੁੱਝ ਸੰਵਾਰਿਆ ਹੈ ਕਿ ਆਪਣਾ। ਉਨਾ ਕਿਹਾ ਕਿ ਭੁਲੇਖੇ ਚ ਨਾਂ ਰਹਿਣਾ , ਉਹ ਤਾਂ ਬਾਬੇ ਨਾਨਕ ਦੀ ਤੱਕੜੀ ਹੀ ਸੀ ਜਿਹੜੀ ਤੇਰਾ ਤੇਰਾ ਤੋਲਦੀ ਸੀ ਅਕਾਲੀਆਂ ਦੀ ਤੱਕੜੀ ਤਾਂ ਮੇਰਾ ਮੇਰਾ ਤੋਲਦੀ ਹੈ,ਤੁਸੀਂ ਕਿਸੇ ਧੋਖੇ ਵਿਚ ਨਾਂ ਆਉਣਾ ਤੇ ਟੈਲੀਵੀਯਨ ਤੇ ਮੋਹਰ ਲਗਾਕੇ ਆਪਣੇ ਸੱਚੇ ਸੇਵਕ ਨੂੰ ਜਿਤਾਉਣਾਂ।

ਡਾਕਟਰ ਵੀ ਚੋਣ ਮੈਦਾਨ ਚ

ਸਿਆਣਿਆਂ ਨੇ ਕਿਹਾ ਹੈ ਕਿ ਬਿਗਾਨੀ ਖੁਰਲੀ ਦਾ ਖੋਰ ਮਿੱਠਾ ਹੁੰਦਾ ਹੈ। ਰਾਜਨੀਤਕ ਲੋਕਾਂ ਦੀ ਸੰਪਤੀ ਨੂੰ ਕੌੜੀ ਵੇਲ ਵਾਂਗ ਵਧਦਿਆਂ ਵੇਖਕੇ ਡਾਕਟਰਾਂ ਦੇ ਮੂੰਹ ਵਿਚ ਵੀ ਪਾਣੀ ਆ ਗਿਆ ਹੈ ਅਤੇ ਉਨਾਂ ਨੇ ਵੀ ਸੋਚ ਲਿਆ ਹੈ ਕਿ ਰਾਜਨੀਤੀ ਤੋਂ ਵਧੀਆ ਸੌਖਾ ਤੇ ਆਮਦਨ ਵਾਲਾ ਹੋਰ ਕੋਈ ਵਪਾਰ ਨਹੀਂ। ਜਿਸ ਕਰਕੇ ਇਸ ਵਾਰ ਅਫਸਰਾਂ ਦੇ ਨਾਲ ਨਾਲ ਡਾਕਟਰ ਵੀ ਚੋਣ ਮੈਦਾਨ ਵਿਚ ਆ ਗਏ ਹਨ। ਅਫਸਰ ਤਾਂ ਸ਼ੇਰਾਂ ਦੀ ਮਾਰੀ ਮਾਰ ਚੋਂ ਗਿੱਦੜ ਬਣਕੇ ਮਾਸ ਛਕਦੇ ਰਹੇ ਹਨ ਅਤੇ ਇਨਾਂ ਦੇ ਮੂੰਹ ਪਹਿਲਾਂ ਹੀ ਲਹੂ ਲੱਗਾ ਹੋਇਆ ਹੈ । ਦਿਲਚਸਪ ਗੱਲ ਇਹ ਹੈ ਕਿ ਇਨਾਂ ਚੋਣ ਲੜਨ ਵਾਲੇ ਡਾਕਟਰਾਂ ਵਿਚ ਐਮ ਬੀ ਬੀ ਐਸ ਅਤੇ ਇਕ ਐਮ ਡੀ ਡਾਕਟਰ ਹੈ। ਇਹ ਗਿਣਤੀ ਵਿਚ ਦਰਜਨ ਦੇ ਕਰੀਬ ਹਨ ਜਿਨਾਂ ਵਿਚੋਂ ਚਾਰ ਪੀਪਲਜ਼ ਪਾਰਟੀ ਵੱਲੋਂ, ਦੋ ਕਾਂਗਰਸ ਵੱਲੋਂ , ਦੋ ਬਸਪਾ ਵੱਲੋਂ, ਦੋ ਅਕਾਲੀਆਂ ਵੱਲੋਂ, ਇਕ ਆਜ਼ਾਦ। ਇਨਾਂ ਵਿਚ ਇਕ ਵੈਟਨਰੀ ਡਾ: ਮੋਗਾ ਤੋਂ ਚੋਣ ਲੜ ਰਿਹਾ ਹੈ ਅਤੇ ਕੁੱਝ ਫਾਰਮੇਸੀ ਵਾਲੇ ਵੀ ਚੋਣ ਲੜ ਰਹੇ ਹਨ।